வவுனியாவில் வீட்டில் தனியாக இருந்த குடும்பஸ்தர் மர்மமான முறையில் உயிரிழப்பு!

வவுனியா பண்டாரிக்குளம் பகுதியில் குடும்பஸ்தர் ஒருவர் தனது வீட்டில் மரணமடைந்த நிலையில் நேற்று (07) மாலை மீட்கப்பட்டார் என பொலிசார் தெரிவித்துள்ளனர்.

பண்டாரிக்குளம் 3 ஆம் ஒழுங்கைச் சேர்ந்த வீட்டில் அவரின் சடலம் கண்டுபிடிக்கப்பட்டது. அப்போது வீட்டில் அவர் மட்டும் இருந்தார், ஏனெனில் அவரது மனைவி ஆசிரியையாக பணிபுரியும் காரணத்தால் பாடசாலைக்கு சென்றிருந்தார்.

பாடசாலை முடிந்து பிற்பகல் 1.45 மணியளவில் மனைவி வீடு திரும்பி கதவைத் திறக்க முயன்றபோது, நீண்ட நேரமாக பதில் கிடைக்கவில்லை.

அயலவர்களின் உதவியுடன் மதிலால் ஏறிச் சென்று கதவைத் திறந்தபோது, கணவர் அறையில் உயிரிழந்த நிலையில் கிடந்ததை கண்டுபிடித்தனர். மேலும், அவரது தலையில் காயம் இருந்ததாகவும் தெரிவிக்கப்பட்டுள்ளது.

சம்பவ இடத்திற்கு வந்த பொலிசார் மற்றும் திடீர் மரண விசாரணை அதிகாரி, உடற்கூற்று பரிசோதனைக்காக சடலத்தை அனுப்பி வைத்துள்ளனர்.

ஆரம்ப கட்ட விசாரணையில், வீட்டில் உள்ள கட்டிலின் மேல் ஏறி சுவருக்கு வர்ணம் பூசும்போது தவறி விழுந்து உயிரிழந்திருக்கலாம் என சந்தேகிக்கப்படுகிறது.