வவுனியாவில் வாக்காளர் அட்டைகள் மீட்பு : ஜனநாயகத்தையே கேள்விக்குள்ளாக்கும் ஆளும் தரப்பின் செயல்பாடுகள்?

வவுனியா – ஏப்ரல் 29, 2025: வவுனியா பூந்தோட்டம் பகுதியில் உள்ள ஒரு வியாபார நிலையத்திலிருந்து உள்ளூராட்சி தேர்தலுக்கான வாக்காளர் அட்டைகள் சட்டவிரோதமாக மீட்கப்பட்டதோடு, அதற்குடன் தொடர்புடையது ஆளும் கட்சி வேட்பாளரின் சகோதரர் என்பதுதான் பெரும் அதிர்வை ஏற்படுத்தியுள்ளது.

இச் சம்பவத்தில், ஒரு பொதுமகனுக்கான அடையாள ஆவணமான வாக்காளர் அட்டையை, அரசியல் ஆட்சி அதிகாரத்தோடு தொடர்புடையவர்கள் தமது கட்டுப்பாட்டில் வைத்திருப்பது, ஜனநாயகத்தின் அடிப்படையையே சீர்குலைக்கும் செயல் என சமூக செயற்பாட்டாளர்கள் கண்டனம் தெரிவிக்கின்றனர்.

பொலிசாரின் தகவலின்படி, தேர்தல் திணைக்களத்திற்கு கிடைத்த முறைப்பாட்டின் பேரில் மேற்கொள்ளப்பட்ட சோதனையில், பலவகை அரசியல் சாயல்கள் நுழைந்திருக்கும் சந்தேகங்கள் மேலும் உறுதியடைந்துள்ளன.

இருவர் — வேட்பாளரின் சகோதரரும், அப்பகுதிக்குரிய தபால் ஊழியரும் — தற்போது கைது செய்யப்பட்டுள்ள நிலையில், மே 6 ஆம் திகதி வரை அவர்கள் விளக்கமறியலில் வைக்கப்பட்டுள்ளனர்.

தேர்தல் என்பது வெறும் வாக்குப் பதிவு நிகழ்வு அல்ல, அது ஜனநாயகத்தின் இதயம். அதனைக் காப்பது அனைவரது பொறுப்பும், அரசியல் சக்திகளின் அநாகரிக அணுகுமுறைகளை கண்டித்தல் அவசியம் ஆகும்.