கண்டி – ஹேவஹெத்தா சாலையில் பேருந்து மீது மரம் சரிந்து விபத்து – ஒருவர் உயிரிழப்பு, பத்து பேர் காயம்!

கண்டியிலிருந்து ஹேவஹெத்த நோக்கி பயணித்த இலங்கை போக்குவரத்து சபை (SLTB) பேருந்து மீது பைன் மரம் ஒன்று சரிந்ததில், ஒருவர் உயிரிழந்ததுடன் பத்து பேர் காயமடைந்துள்ளனர்.

இந்த துயரச்சம்பவம் இன்று மதியம் ஹல்வத்தே பகுதியில் இடம்பெற்றதாக காவல்துறை தெரிவித்துள்ளது.

உயிரிழந்தவர் வயது 57 என்று அடையாளம் காணப்பட்டுள்ளார்.

காயமடைந்தவர்கள் உடனடியாக களஹா மருத்துவமனைக்கு கொண்டு செல்லப்பட்டதுடன், சிலரின் நிலை மோசமடைந்ததால் அவர்கள் பேராதனை மருத்துவமனைக்கு மாற்றப்பட்டுள்ளனர்.

கண்டி – ஹேவஹெத்த பிரதான வீதியில் பலத்த காற்றும் மழையும் காரணமாக மரம் சாலையில் சரிந்து விழுந்திருக்கலாம் என ஆரம்ப விசாரணைகள் தெரிவிக்கின்றன.

காவல்துறை சம்பவத்திற்கான மேலதிக விசாரணைகளை முன்னெடுத்து வருகின்றது.