டிஎன்ஏ அமைப்பைக் கண்டறிந்த மகத்தான விஞ்ஞானி ஜேம்ஸ் வாட்ஸன் மறைந்தார்!

உலக அறிவியல் வரலாற்றில் புரட்சிகரமான மாற்றத்தை ஏற்படுத்திய டிஎன்ஏவின் இரட்டை ஹீலிக்ஸ் (Double Helix) அமைப்பைக் கண்டறிந்த நோபல் பரிசு பெற்ற அமெரிக்க விஞ்ஞானி ஜேம்ஸ் டி. வாட்ஸன் (James D. Watson) 97 ஆவது வயதில் மரணமடைந்தார்.

அவரது மறைவு செய்தியை, பல தசாப்தங்களாக அவர் பணியாற்றிய Cold Spring Harbor Laboratory உறுதிப்படுத்தியுள்ளது.

1953 ஆம் ஆண்டில் வாட்ஸன், பிரித்தானிய விஞ்ஞானி பிரான்சிஸ் கிரிக் (Francis Crick) உடன் இணைந்து டிஎன்ஏவின் இரட்டை ஹீலிக்ஸ் அமைப்பை கண்டறிந்தார். இது 20ஆம் நூற்றாண்டின் மிகப்பெரிய அறிவியல் முன்னேற்றங்களில் ஒன்றாகக் கருதப்படுகிறது.

இந்த கண்டுபிடிப்பு மரபணு அறிவியலில் புதிய திசையைக் காட்டி, மருந்தியல், மருத்துவம், குற்றவியல் மற்றும் உயிரியல் துறைகளில் அடிப்படை மாற்றங்களை ஏற்படுத்தியது.

அவரும், கிரிக்கும், மொரிஸ் வில்கின்சும் (Maurice Wilkins) இணைந்து 1962 ஆம் ஆண்டில் நோபல் பரிசை பெற்றனர்.

“நாம் வாழ்க்கையின் ரகசியத்தை கண்டுபிடித்துள்ளோம்,”
என்று அப்போது அவர்கள் அறிவித்தனர்.

வாட்ஸனின் விஞ்ஞான சாதனைகள் உலகளாவிய அளவில் புகழைப் பெற்றிருந்தாலும், அவரது வாழ்க்கையின் பின்னர் பகுதியில் அவர் வெளியிட்ட சில கருத்துகள் கடுமையான சர்ச்சையை ஏற்படுத்தின.

2007 ஆம் ஆண்டில் அவர் ஆபிரிக்க மக்களின் அறிவாற்றல் குறித்து சர்ச்சைக்குரிய கருத்து வெளியிட்டதைத் தொடர்ந்து, நியூயார்க்கில் உள்ள Cold Spring Harbor Laboratoryயில் அவர் வகித்த துணைவேந்தர் (Chancellor) பதவியிலிருந்து நீக்கப்பட்டார்.

2019 இல் அவர் மீண்டும் இனத்துடன் தொடர்புடைய கருத்துகளை வெளியிட்டதை அடுத்து, அந்த நிறுவனம் அவருடைய மரியாதைப்பட்டங்கள் மற்றும் பேராசிரியர் நிலையை ரத்து செய்தது.

அந்நிறுவனம் வெளியிட்ட அறிக்கையில்,

“டாக்டர் வாட்ஸனின் கருத்துகள் விஞ்ஞான ஆதாரமற்றதும், கண்டிக்கத்தக்கவையும் ஆகும்,”
என்று தெரிவித்தது.

ஜேம்ஸ் வாட்ஸன் 1928 ஏப்ரல் மாதத்தில் சிகாகோவில் பிறந்தார். 15 ஆவது வயதில் சிகாகோப் பல்கலைக்கழகத்தில் கல்வி உதவித்தொகையுடன் சேர்ந்து, உயிரியல் மற்றும் கதிர் விலக்கம் (X-ray diffraction) முறையில் ஆர்வம் காட்டினார்.

அதன் பின்னர் கேம்பிரிட்ஜ் பல்கலைக்கழகத்தில் டிஎன்ஏ அமைப்பை ஆராய்ந்தபோது, கிரிக்குடன் இணைந்து பணியாற்றினார். அவர்கள் கிங்ஸ் கல்லூரி ஆராய்ச்சியாளர் ரோசலிண்ட் ஃபிராங்க்ளினின் (Rosalind Franklin) அனுமதியின்றி பெறப்பட்ட X-ray படங்களைப் பயன்படுத்தி டிஎன்ஏவின் மாதிரியை உருவாக்கினர்.

பின்னர் அவர் ஹார்வர்டு பல்கலைக்கழகத்தில் உயிரியல் பேராசிரியராக பணியாற்றி, உலகளாவிய அளவில் பல மாணவர்களை வழிநடத்தினார்.

1968 ஆம் ஆண்டில் அவர் Cold Spring Harbor Laboratoryயின் இயக்குநராக பொறுப்பேற்று, அதை உலகின் முன்னணி உயிரியல் ஆராய்ச்சி மையங்களில் ஒன்றாக மாற்றியமைத்தார்.

அவரது சில கருத்துகள் சர்ச்சையை ஏற்படுத்தினாலும், வாட்ஸன் மனித மரபணு அறிவியலின் அடித்தளத்தை அமைத்தவர் என உலக அறிவியல் சமூகத்தால் ஏற்றுக்கொள்ளப்படுகிறார்.

அவரது ஆராய்ச்சியின் அடிப்படையில் இன்று மரபணு சிகிச்சைகள், மரபணு பரிசோதனைகள் மற்றும் உயிரியல் தொழில்நுட்பங்கள் விரைவாக வளர்ந்துள்ளன.

(மூலம்: BBC, Reuters, AP News, National Geographic)