இலங்கை அருகே தாழ் காற்றழுத்தம் உருவாகும் சாத்தியம்: நாடு முழுவதும் கனமழை எச்சரிக்கை!

இலங்கை அருகிலுள்ள வான்வெளியில் காணப்படும் தாழ்நிலை வளிமண்டல குழப்பம் நாளை (25) குறைந்த காற்றழுத்தத் தளமாக உருவெடுக்கும் வாய்ப்பு உள்ளதாக வானிலைத் திணைக்களம் தெரிவித்துள்ளது.

இதனடிப்படையில், தீவு முழுவதும் நிலவும் மழைக்கால நிலைமை அடுத்த சில நாட்களிலும் தொடரும் எனக் கூறப்பட்டுள்ளது.

வடக்கு, வடமத்திய, கிழக்கு மற்றும் ஊவா மாகாணங்களிலும், ஹம்பாந்தோட்டை மற்றும் மாத்தளை மாவட்டங்களிலும் இடையிடையே மழை அல்லது இடியுடன் கூடிய மழை பெய்யக்கூடும் என வானிலைத் திணைக்களம் தெரிவித்துள்ளது.

தீவின் பிற பகுதிகளில் பிற்பகல் 1.00 மணிக்குப் பிறகு மழை அல்லது இடியுடன் கூடிய மழை ஏற்படும்.

இதற்கிடையில், கிழக்கு, வடமத்திய, ஊவா மற்றும் தென் மாகாணங்களில் 100 மில்லிமீற்றருக்கு மேற்பட்ட கனமழை ஏற்படும் வாய்ப்பு உள்ளதுடன், தீவின் பிற பகுதிகளில் 75 மில்லிமீற்றருக்கு மேற்பட்ட மிதமான கனமழை ஏற்படும் எனவும் வானிலைத் திணைக்களம் தெரிவித்துள்ளது.

வடக்கு மாகாணத்தில் மணிக்கு 40 கிலோமீற்றர் வேகத்தில் பலத்த காற்று வீசக்கூடும் எனவும் எச்சரிக்கை விடுக்கப்பட்டுள்ளது.

மேலும், இடியுடன் கூடிய மழை ஏற்படும் போது ஏற்படக்கூடிய திடீர் பலத்த காற்று மற்றும் மின்னல் தாக்கத்தால் சேதங்களைத் தவிர்க்க தேவையான முன்னெச்சரிக்கை நடவடிக்கைகளை எடுக்க பொதுமக்கள் கேட்டுக்கொள்ளப்பட்டுள்ளனர்.