மிஸ் யுனிவர்ஸ் இணை உரிமையாளருக்கு தாய்லாந்தில் கைது வாரண்ட்!

உலக அழகிப் போட்டிகளில் மிக முக்கியமான மிஸ் யுனிவர்ஸ் போட்டி மீண்டும் சர்ச்சையில் சிக்கியுள்ளது. போட்டியின் இணை உரிமையாளரும் ஊடக உலகின் செல்வாக்கு மிக்க முகவருமான அன் ஜகபாங் ஜக்ரஜுட்டிப் மீது தாய்லாந்து நீதிமன்றம் 930,000 அமெரிக்க டாலர் — இலங்கை ரூபாய் கணக்கில் சுமார் 2 கோடி 83 லட்சம் மதிப்பிலான மோசடி குற்றச்சாட்டின் பேரில் கைது வாரண்ட் பிறப்பித்துள்ளது.

செவ்வாய்க்கிழமை வழங்கப்பட இருந்த தீர்ப்பளிக்க நீதிமன்றத்தில் ஆஜராகாததை அடுத்து, அன் ஜகபாங் “தப்பியோட முயற்சி செய்கிறார்” என நீதிமன்றம் கருதி அவருக்கு எதிராக கைது வாரண்ட் பிறப்பித்துள்ளது.
தீர்ப்பளிப்பு விசாரணை இப்போது டிசம்பர் 26 அன்று நடைபெறவுள்ளதாக நீதிமன்றம் அறிவித்துள்ளது.

இதற்கிடையில், அதிகரித்து வரும் நிதி நெருக்கடிகளை முன்னிட்டு ஜகபாங் மெக்சிகோவுக்கு புறப்பட்டுள்ளதாக உள்ளூர் ஊடகங்கள் செய்தி வெளியிட்டுள்ளன.

பாங்காக்கில் நடைபெற்ற இந்த ஆண்டின் மிஸ் யுனிவர்ஸ் போட்டி பல சர்ச்சைகளால் மங்கியது.
நிகழ்ச்சி தொகுப்பாளரும், இறுதியில் பட்டம் வென்ற மிஸ் மெக்சிகோ பாட்டிமா போஷ் ஆகியோருக்கிடையே ஏற்பட்ட வாக்குவாதம் நேரலை ஒளிபரப்பில் வெளிப்பட, இது சமூக ஊடகங்களில் பெரும் விவாதத்தை ஏற்படுத்தியது.

ப்ரமோஷன் பதிவுகளை வெளியிடவில்லை என்ற குற்றச்சாட்டில் போட்டியாளரிடம் தொகுப்பாளர் கடுமையாகப் பேசியதோடு, அவரை “முட்டாள்” என அவமரியாதை செய்ததாக குற்றச்சாட்டுகள் எழுந்தன.
இதன் பின்னர், மிஸ் மெக்சிகோ மேடையை விட்டு வெளியேறி, பிற போட்டியாளர்களையும் தன்னுடன் அழைத்துச் சென்றார்.
அதன் தாக்கத்தில், தொகுப்பாளர் கண்கலங்கிய செய்தியாளர் சந்திப்பில் மன்னிப்பு கோர வேண்டிய நிலை ஏற்பட்டது.

இந்த சம்பவம் மெக்சிகோ அதிபர் கிளௌடியா ஷெயின்பாம் கவனத்தையும் ஈர்த்தது. போட்டியாளரின் துணிந்த செயலை அவர் பாராட்டினார்.

மிஸ் யுனிவர்ஸ் போட்டி முன்பு அமெரிக்க முன்னாள் அதிபர் டொனால்ட் டிரம்பின் சொந்தமாக இருந்தது.
2022ஆம் ஆண்டு அன் ஜகபாங் தலைமையிலான JKN Global Group, இந்த போட்டியை 20 மில்லியன் அமெரிக்க டாலருக்கு ( ரூ. 6 கோடி 10 லட்சம்) வாங்கியது.
பின்னர், நிறுவனத்தின் நிதிநிலையை மேம்படுத்தும் முயற்சியாக, பங்கு உரிமையின் பாதியை 16 மில்லியன் அமெரிக்க டாலருக்கு மெக்சிகோ நிறுவனமான Legacy Holding Group USA-க்கு விற்றது.

ஆனால் இதன்மேல் நிதி சிக்கல்கள் தீவிரமடைந்தன.
2024ஆம் ஆண்டு நிதி அறிக்கைகளை சமர்ப்பிக்கத் தவறியதோடு, சில ஆவணங்களில் பொய்யான தகவல்கள் இடம்பெற்றிருந்ததாக நிரூபிக்கப்பட்டதால், தாய்லாந்து பங்குச் சந்தை JKN நிறுவன பங்குகளை பட்டியலிலிருந்து நீக்கியது என்பது குறிப்பிடத்தக்கது.