சமூக ஊடகங்கள் தடைசெய்யப்பட்டமையினால் அரசியல் நெருக்கடியில் நேபாளம்!

 ஊழல், சமூக ஊடகத் தடைகள், இளைஞர்கள்மீது போலீஸ் கடுமை ஆகியவற்றுக்கு எதிராக ‘Gen Z’ இளைஞர்கள் முன்னெடுத்த மகா மறியல் அலைக்குப் பிந்தைய அரசியல் குழப்பத்தில் நேபாளப் பிரதமர் கே.பி. ஷர்மா ஒளி நேற்றைய தினம் திடீர் ராஜினாமா செய்தார்.

முன்னதாக, நாடாளுமன்றம் மற்றும் கத்த்மண்டு நகரின் பல பகுதிகளில் நடந்த மோதல்களில் 19 பேர் உயிரிழந்ததோடு 500-க்கும் மேற்பட்டோர் காயமடைந்திருந்தனர். போர் நிலையை ஒத்த பாதுகாப்பு நிலைமையிலும், பொதுமக்கள் தொடர்ந்தும் வீதிகளில் போராட்டம் நடத்தினர்.

ஒளி தனது ராஜினாமா கடிதத்தை ஜனாதிபதி ராம்சந்திர பௌடேலிடம் சமர்ப்பித்து, “அரசியல் நெருக்கடியைத் தீர்க்க அரசியலமைப்பு வழித் தீர்வுகள் தேவை. அதற்காக எனது பதவியை விலகுகிறேன்” என்று குறிப்பிட்டுள்ளார்.

இதனையடுத்து, நேபாளம் முழுவதும் விதிக்கப்பட்ட சமூக ஊடகத் தடைகள் நீக்கப்பட்டுள்ளன. காயமடைந்தோருக்கு சிகிச்சை, உயிரிழந்தோரின் குடும்பங்களுக்கு நிவாரணம் வழங்குவதாக அரசு அறிவித்துள்ளது.

நேபாளம் முழுவதும் பதற்றம் நிலவும் நிலையில், அடுத்த அரசாங்க அமைப்பு குறித்த அரசியல் பேச்சுவார்த்தைகள் தீவிரமாக நடைபெற்று வருகின்றன.